საპროექტო ტერიტორია მდებარეობს ქ.ქუთაისში, წერეთლის ქუჩაზე, ისტორიულ უბანში, (კულტურული მემკვიდრეობის უძრავი ძეგლის ვიზუალური დაცვის არეალში) პროექტს გააჩნია უნიკალური მდებარეობა, შენობა წარმოადგენს ოთხ სართულიან ინდივიდუალურ საცხოვრებელ სახლს სარდაფით.

საპროექტო ტერიტორიის სპეციფიკიდან გამომდინარე, ჩვენი რეფლექსია მთლიანად ისტორიული მოტივებით იყო შთაგონებული. დამკვეთის სურვილებზე სრულად მორგებული ობიექტი, საკუთარი არსებობით ამტკიცებს თანამედროვე გადაწყვეტების, უახლესი ტენდენციებისა და ისტორიული მემკვიდრეობის ჰარმონიული თანაარსებობის შესაძლებლობას. ის წარმოადგენს ქალაქზე ზრუნვისა და პატივისცემის საუკეთესო გამოცდილებას.

სახლის ფასადური ნაწილი ორ ბლოკად გადანაწილდა, რაც ფუნქციების ურთიერთკავშირმაც განსაზღვრა. თითოეული ბლოკი ქვითაა მოპირკეთებული და გარკვეულწილად იმეორებს მეზობელი საცხვრებელი სახლების ხასიათს, სარკმლების განსხვავებული კონფიგურაციის მოჩარჩოება, სადაც მორთული პარაპეტები, აივნების მინიმალისტური დიზაინი, საბოლოო ჯამში, უნიკალურ და დინამიურ ხასიათს ანიჭებს სახლს.

ინტერიერიდან ხედები იშლება, როგორც გზის მხარეს, ასევე კარგად ჩანს უძველესი ისტორიის მქონე ბაგრატის საკათედრო ტაძარი, რაც გამოარჩევს შენობას და შეუფასებელს ხდის მის მნიშვნელობას მესაკუთრისათვის. გადაწყვეტის ისტორიულ-არქიტექტურული სტილი მეტ სითბოს, ინდივიდუალიზმსა და მდიდრულ იერს სძენს შენობას.